മദര്‍ കെയര്‍

അമ്മ മരിച്ചതറിഞ്ഞ്

അമേരിക്കയിലുള്ള മോനെത്തി,

ആഫ്രിക്കയിലുള്ള മോളുമെത്തി,

ആര്‍ത്തനാദത്തോടലമുറയിട്ട്!!

ജീവിതകാലത്തെത്തിനോക്കാത്ത

മക്കളുടെ മുതലക്കണ്ണീര്‍,

പ്രകാശമില്ലാത്തതിനാല്‍

അമ്മക്കണ്ണില്‍ പതിഞ്ഞില്ല!

സ്‌നേഹവാത്സല്യത്തിനമൃത്

അടങ്ങിയൊരിത്തിരി മണ്ണില്‍

ഒത്തിരി മണ്ണിനിയും ബാക്കി

ആ മണ്ണിലാണ് മക്കള്‍ക്കു കണ്ണ്!

ശേഷക്രിയകള്‍ തീരും മുമ്പേ

ശേഷിപ്പുകളും സ്വത്തുകളും

ഓഹരി വെച്ചിട്ടവിടെത്തന്നെ

വിറ്റൊഴിവാക്കി മടങ്ങുന്നേരം

അമ്മയുറങ്ങുമൊരു തുണ്ടുഭൂമി

അല്ലാത്തതെല്ലാം അന്നന്യമായി!

വഴിയില്‍ നിന്നാണറിയുന്നത്,

അമ്മയുറങ്ങുന്ന ഭൂമിക്ക്

കോടികളുടെ ലാഭക്കണക്ക്!

അവരതും മുദ്രപ്പത്രത്തിലാക്കി!!!

അങ്ങനെ,

അമ്മയുടെ നെഞ്ചിലാണ്

'മദര്‍ കെയര്‍' 

ഹോസ്പിറ്റലുയര്‍ന്നത് !
((((((((((( Facebook )))))))))))